أشعار بالعامية المصرية للشاعر يوسف عزب
أحضن أشباحك في الضلمه
إعشق تفاصيلهم بالملي
فرّحهم لو حتى بكلمه
و استسلم للضمه تملي
هما الباقيين العارفين
وجعك ميجوزش على اتنين
فَ بَلاها الطيبه اللي بتظهر على هيئة ذُل
و ان زادت بؤرة أوجاعك إملاها كحول
مجنون العالم بوجودك
من أول دمعه على خدودك
أصبح هستيرى ف أفعاله
العالم ظالم بحلاله
فطبيعي يشدّك و يهدّك
إرسم معشوقتك عالحيطه
و اتعامل على إنك قادر
لو جاتلك فرصه امسك فيها
أو حب عذابك أو غادر
أشباح تخاريفك مش ممكن…
تقدر تتجاهل إحساسك
أشباحك مجنونه بحبك
احضنهم و اقفل ترباسك
النور بيبان لما تضلم
فَ لتحيا الضلمه عشان حلمك
احلم و استمتع بعذابك
و اقفل على بابك…
باب أكبر
الحلوه بتسمح بغيابك
فلتعشق أشباحك أكتر
