يا الله يامنجي من البحر ذا النون
ويا الله يا مسلِّم من الضرّ أيوب
ويا الله يا وآمر عبيده يحجون
يا كاشف الشدات عن كل مكروب
تقول للشي كن في الحال ويكون
ما كان واللي بعد في اللوح مكتوب
ترفع عن الأمة مرض منه يشكون
صغير ما ينشاف لكن مندوب
من خالق الاكوان مهما يقولون
له حكمةٍ والناس راهب ومرهوب
يارب تشفي منه ناسٍ يعانون
بامرك يزول الذنب عن كل مذنوب
يارب حنّا من عبيدٍ يصلّون
وأنت تفك من النشب كل منشوب
ويارب حنّا من عبيدٍ يصومون
ابرحمتك حقق لنا كل مطلوب
نرجوك يا معبود والخلق يرجون
رفع المرض عنّا وعن كل مصيوب
أمر الاله أقرب من الكاف للنون
وبامره يزول الرعب عن كل مرعوب
وبامر الولي كل المصابين يشفون
وبامره يلين الصخر في الحال ويذوب
يا ذا الجلال احفظ كريمين يثنون
دون الوطن والشعب ما يشكي عزوب
حكامنا في كل ماجوب يبدون
دون الوطن ما وفرّوا شي محسوب
في حبّهم والله ما نقبل الدون
تاج الوطن واحنا لهم درع واجنوب
