قالوا أبردين الجميله وَناسه
ورياض وأنهارٍ بها جبر خاطر
قلت الوطن يا زين داره وناسه
أهل الوفا والطيب ماضي وحاضر
ربعي هلَ العوجا وللعزّ ساسه
عاشوا على التوحيد كابر لكابر
حنْ وارثين المجد، ما هي دراسه
وإليا درسنا العلم جبنا المفاخر
الله حبانا دار خير وقداسه
طيبة ومكة والحرم والمشاعر
نحمي حماها ونحرسها حراسه
نكرم حجيج البيت تكريم فاخر
والفنّ في التفويج نرسم أساسه
من عهد أبو تركي لنا ذكر عاطر
واليوم رؤية سيّدي طاب راسه
صارت بها الدنيا تشيد وتحاضر
يشبه معزّي في الذكا والفراسه
هيبة وحِكمة من عيونه تطاير
الشرق الأوسط توجه في السياسه
والعالم أجمع له يطيع ويشاور
هذا ولد سلمان يا قوّ باسه
لكن معَ شعبه كثير المآثر
هذا محمد فخرنا والحماسه
وإليا دعا شعبه يقولون “آمر”
سلمان أبونا طاب فينا غراسه
وابنه محمد ديرته به تفاخر
هذي مصادر عزّتي والوناسه
وإن طاب راسي، مصدر الطيب “ثامر”
زر الذهاب إلى الأعلى