سبحان رب غفور خافض رافع
بر رحيم ودود باسط جامع
ذو الجود فضله عظيم ومالنا غيره
في السعد في الضيق لا هب الهوى الﻻذع
عليه كل اتكالي ومالنا غيره
لاضاق صدري اجيه وطاعته شافع
مفرج الهم لالجت امانينا
المعطي الرازق المنان والنافع
ذو الفضل لامن تكدر حالنا وقلنا
يارب فاض الامل بالخير متدافع
سجدت له في خضوع وزادني رفعه
زبن الضعيف الحزين وملجأ الخاضع
الخير خيره ولالنا بالامل غيره
لامن تعبنا وصار الشق مستاسع
يجبر عنا العبد لامن اتعبه وقته
ويفرج الهم لاصار التعب شاسع
مافيه غيره اجيه يذل محتاجه
انا بدونه هباب وشاخصي ضايع
ذوالجود زبن العليل وملجاء العاني
نخطي ويغفر لمن جا له وهو ضارع
من لاذ به مايخيب ويبشر بسعده
وان ساق رجله فلايدري وش الطالع
جيتك الهي ونا ادري انك المعطي
انا بأمرك لكل اللي تبي خاضع
فاللي مسطر علينا لازم انجي له
يجري مثل مانبي وانشوفه و ساطع
فالعبد ماله سوى اللي قدره ربه
ياتيه لاحان وقته ما عنه رادع
احد(ن)تجي له على ما يشتهي حلوه
مرتاح من همها ومنعم وناجع
يمشي وهو مطمئن وفي الهنا عايش
رزقه وفير وكل اللي يبي فايع
واحد(ن)حياته مريره كاشف(ن)نحره
رغم التعب والشقا لخالقه طايع
راضي بحظه برغم الوجد والقله
لوكان مكلوم فاقد يسكن الشارع
فاللي مسطر قديم وين مارحنا
نلقاه في وقت حله بيين وطالع
فان كنت دايم حزين وحالتك قشرى
فخلك قوي على الاحزان لاجازع
واعرف بأنك مسيير قبل ماتخلق
مكتوب ماشفت قبل اتشوف واتطالع
وارفع يدك في سكون الليل في خلوه
وناج الرؤؤف الرحيم بمهجتك دافع
في ذل عبد(ن)يناجي ربه بشوقه
رغم التعب والشقا لخالقه راكع
لصرت في التيه اوناشك اسى فاصبر
صبر(ن)جميل(ن)وناج القادر السامع
تلقاه ارحم رحيم يدمح الزله
ذوالجود اكرم كريم المعطي المانع
يعدل المايله لالاذ به عبده
وقال يارب ساعدني وهوخاضع
يلقى رجوم الهنا تصاه له وحده
من لطف فضل العظيم الخافظ الرافع
يارب جيتك بضعفي فاجبر العثره
وأغفر ذنوبي انا في رحمتك طامع
وبدل الحال بعد القل والحاجه
بالستر وادمح خطاي وبدل الواقع
مالي سوى الله يجبر عثرتي بمننه
هو اللطيف الكريم الرازق النافع
