هلا. يا أم حمدتو إيش بك كدا لاوية بوزك شبرين. وي يا خويا يعني أنت يهمك إذا أنا زعلانة وإلا راضية. لالا يا أم حمدتو كيف ما أهتم وإحنا لنا غيرك! بس العادة تمدي بوزك شبر واليوم دبلتي المَدة. اسمع يا أبو حمدتو تري أنا ماني فايقة لتهكمكم. ههه ومن وين جبتي هذه الكلمة العادة تقولي تريقتك. أيوه يا أخويا فاكر أنكم أنتم المسقفين بس. يا فتو مثقفين بالثاء مو بالسين. عاد بتقعد لي علي الدقة والدقيقة. لا يالغالية أداعبك فقط ولا أنت القلب والرية وباقي الناس عارية. ومن تزوجنا من أربعين سنة وأنت لمبة العيلة. أيوة يا أخويا أنا عارفة إيش قصدك من ورا الكلويس دايمًا تجيب سيرة الأربعين سنة عشان اللي ما يشتري يتفرج. يا ولية كواليس مو كلاويس. أهو قصروا مش يقولوا كله عند العرب صابون. محصلة بعضها. المهم. أنت مو عارف ليش أنا زعلانة. لا مو عارف. أصلًا “أنت تدوخي من زبيبة” وكل يوم وجهك مقلوب. بس اليوم بوزك زايد حبتين ولازم في شي مو طبيعي. طيب هاتي فطميني أيش مزعل القمر. إذا بوزي ممدود فهذا من أسلوبك المهبب. عمومًا أهو أنت جبتها لما قلت لي بالغلط يا قمر. زوج أختي حجز للعيلة كلها في السفينة الفضائية بيوديهم القمر يتمشوا كم يوم ويرجعوا. يا سلام القمر مرة واحدة. من أكل بعقلك حلاوة وقلك هذا الكلام أنت يا ولية ما تميزي. والله أنت اللي نايم في العسل والناس طلعوا القمر وأنت شغلتك وعملتك وهرجتك اللي ما تتغير. (تتذكري لما كان أبويا يحني الحمار حقه ويركب له ذيك الحدوة اللي تلمع من بعيد ويمشي للشغل والحدوة تشن ويرن وكأنه باشة الحارة). تفكيرك دايمًا قديم وهذا اللي فالح له علي ما تقول جارتنا أم دحمي قاعد علي طعام الوالد. يا أم حمتوا طمام ما هو طعام. شوفي الحين أنا ساكت لك واللهم أخزيك يا شيطان ..وإيش به حمار الوالد كان له هيبة وأجدع رجال يتمني يقتنيه. طيب يا خويا فضها سيرة. حدوة ويحنيه وشوية الخرج والبرسيم حقه وكيف يرفس وما راح نخلص. طيب قصره أنت أيش تبغي. يا أخويا عيلة زوج أختي ما هم أحسن منا بيطلعوا للقمر وإحنا جالسين هنا زي البيت الوقف. أبشري يا فتو بكره أحجز لكم عشان تطلعوا للشمس. آه منك طبعا عشان يتشوي وجهي. طيب يا أخويا ليش ما تروح أنت وبشكتك وتلعبوا هناك البلوت حقكم. بس افتكرت الورقة راح تنحرق وبترجعوا لنا بسرعة. هو بس الورقة مو إحنا راح نتشلفط .. الله علي قساوة قلبك أيوه بيني المستخبي. ترى أنت اللي بديت. وقلت بتطلعنا الشمس. أنا كنت أمزح وما فيها شي يعني لو تقرمشتي حبتين. علي الأقل خدودك تحمر. يعني خدودي ما هي عاجباك صحيح بعد ما أكل وإتكا قال ريحة أكلكم مستكا. شوف تري أنا اللي فيني مكفيني. بطلعنا القمر وإلا لا. طيب. إيش رأيك خلينا نشوف إذا طلعوا القمر من جد هم راح يرجعوا وإلا. وإذا ما رجعوا ساعتها أوديكم من عيوني . صار كدا والله ماني طالعة القمر حتي تشوف نجوم الظهر وقاعدة لك على قلبك. أقلك اعقلي تري كل الحكاية فشنك لا أحد بيطلع القمر ولا هم يحزنون. هذه مجموعات تستغل سذاجة الناس وتأخذ علي كل رأس ثلاثين ألف دولار وتلهفهم وذاك وجه الضيف. تعالي نحسبها أنت والبنات والأولاد سبعة كل رأس بـ30 ألف دولار كيف ندبرها لو فرضًا صحيح. نبيع البيت حيلتنا عشان الفشخرة حقتكم. أقلك لا تتمهزأ فيه تري أنت كحيتي من يومك وكل همك تجمع الفلوس على قلبك. أنا يا ولية نسيتي أول ما أتزوجنا كنت غشيمة في كل شيء وأنا اللي علمتك وشيكتك بفلوسي وياما خسرت عليكي. أنت شيكتني وخسرت علي؟! يا ما جاب الغراب لأمه يا هم ليلي لو أني بقيت علي شورك ومصاريفك كان رحت في ستين داهية الله يخلي أخويا اللي ما خلا علينا قاصر. أقلك تري زودتيها وأنا وصلت معي للآخر وما عاد أتحمل ترهاتك. صار كدا طيب والله ما عاد أقعد لك في هذا البيت ولا دقيقة. أنا الآن ألبس عبايتي أروح لبيت أهلي. مع ألف سلامة بالطقاق. -وتجي خارجة- فيجري وراءها يا أم حمدتو يا قمر الأقمار تكفين أستني. الحين قمر الأقمار لما شفت الجد والله ما أرجع لو تطلع في رأسك نخلة وأطبخ أحمد ما عندك. هههه يا ولية أحمض مو أحمد. عليَّ العموم أنت ترى فهمتي الموضوع غلط أنا قصدي من فضلك وأنت خارجة يا قمر بالمرة خذي العيال معاكي ولا تنسي تقفلي باب الحوش وراكم.
